Azərbaycan rəqabətdə: 12 göstəricinin 9-u yaxşılaşıb
İqtisadi İslahatların Təhlili və Kommunikasiya Mərkəzi Azərbaycanın yeni qlobal rəqabətlilik indeksində 137 ölkə arasında 35-ci yerə yüksəlməsi ilə bağlı açıqlama yayıb (Azərbaycan qlobal rəqabətlilik reytinqində irəlilədi). Açıqlamada qeyd olunur ki, Azərbaycan Dünya İqtisadi Forumunun hazırladığı reytinqdə dünya ölkələrinin hər dördündən üçünü geridə qoyaraq MDB-də liderliyini qoruyub: “Hətta G20-yə daxil olan İtaliya, Rusiya, İndoneziya, Hindistan, Türkiyə, Cənubi Afrika Respublikası kimi ölkələr də iqtisadiyyatın rəqabət qabiliyyəti indeksinə görə Azərbaycandan geridə qalır.
2017-2018-ci illər üzrə qlobal rəqabətlilik hesabatında Azərbaycanın mövqeyi 12 indikatordan 9 indikator üzrə yaxşılaşıb: institutlar (15 pillə irəliləyərək 33-cü yer), infrastruktur (4 pillə irəliləyərək 51-ci yer), səhiyyə və ibtidai təhsil (1 pillə irəliləyərək 74-cü yer), ali təhsil və təlim (10 pillə irəliləyərək 68-ci yer), əmtəə bazarının səmərəliliyi (19 pillə irəliləyərək 31-ci yer), əmək bazarının səmərəliliyi (9 pillə irəliləyərək 17-ci yer), maliyyə bazarının inkişafı (18 pillə irəliləyərək 79-cu yer), biznesin mürəkkəbliyi (20 pillə irəliləyərək 40-cı yer) və innovasiya (11 pillə irəliləyərək 33-cü yer).
Bazarın həcmi indikatoruna görə hesabatdakı mövqeyimizdə dəyişiklik baş verməyib. İki indikator – makroiqtisadi mühit və texnoloji hazırlıq üzrə isə geriləmə olub”.
