Qanunsuz referendumun ilkin nəticələri
İraqdakı kürd muxtariyyəti rejiminin sentyabrın 25-də keçirdiyi qanunsuz referendumun ilkin nəticələri açıqlanıb.
Referenduma “Siz Kürdüstan regionu və onun hüdudlarından kənardakı kürd ərazilərinin müstəqil dövlət olmasını istəyirsinizmi” sualı çıxarılmışdı. Novator.az-ın məlumatına görə, ilkin nəticələrdən referenduma qatılanların 93 faizindən çoxunun müstəqilliyə səs verdiyi görünür.
Səsverməyə 3,3 milyon nəfərin (seçicilərin 72 faizindən çoxunun) gəldiyi bildirilir. Qanunsuz referenduma muxtariyyətə aidiyyəti olmayan ərazilərdə, o cümlədən Kərkük vilayətində yaşayan kürdlər də cəlb edilib.
İraq dövləti referendumu ölkə konstitusiyasına zidd sayır. Qonşu ölkələr və beynəlxalq güclər də səsvermənin legitim olmadığını bildirirlər.
Novator.az qeyd edir ki, Rusiya mənbələrinə əsasən, İraqda 7 milyon (ümumi əhalinin 20 faizi qədər), Türkiyədə 15 milyon (ümumi əhalinin 19 faizi qədər), İranda 8 milyon (ümumi əhalinin 10 faizi qədər), Suriyada 2 milyon (ümumi əhalinin 9 faizi qədər) kürd yaşayır.
Kürdlərin 90 faizinin islama, 1 faizinin xristianlığa, 9 faizinin digər dinlərə mənsub olduğu bildirilir.
