Jurnalist həbsinin səbəbini necə izah edir?
Jurnalist Ziya Əsədli hesab edir ki, onun tutulmasının səbəbi “Azadlıq” qəzetinin bölgə müxbiri olması, bu il aprelin 5-də Biləsuvarda insanların etiraz aksiyası keçirərək yolu bağlamaları barədə hazırladığı repotajın Azadliq.info saytında yayılmasıdır.
Novator.az-ın məlumatına görə, Ziya Əsədli bunu sentyabrın 25-də Bakı İstintaq Təcridxanasında onunla görüşən vəkili Elçin Sadıqova deyib.
Vəkilin bildirdiyinə görə, ikinci qrup əlil olan Ziya Əsədlinin səhhətində ciddi problemlər var.
Ziya Əsədli aprelin 19-da Biləsuvar rayonundakı çayxanaların birində baş vermiş insidentə görə tutulub. Jurnalist iddia edir ki, çayxanada onu döyüblər. Çayxana işçisi isə jurnalistin onu döydüyünü iddia edir. Hər iki tərəf insidentdən sonra özünün döyüldüyü barədə polisə məlumat verib.
Sentyabrın 5-də Biləsuvar Rayon Məhkəməsi Ziya Əsədlini Cinayət Məcəlləsinin 221.3-cü (silah və ya silah kimi istifadə edilən predmetdən istifadə ilə xuliqanlıq) maddəsi ilə təqsirli bilərək 3 il müddətinə azadlıqdan məhrum edib.
“Azadlıq” qəzeti 2016-cı il sentyabrın 5-dən nəşr olunmur.
