Deputat hesab edir ki, Müsavatın təklifi adamları yora bilər
Milli Məclisin deputatı Zahid Oruc Müsavat Partiyasının seçki və təşviqat kampaniyalarının müddətlərini dəyişmək təklifinə münasibət bildirib.
Bu günlərdə Müsavat Partiyası seçki islahatları ilə bağlı təkliflər layihəsi açıqlayıb. Təkliflərdən biri də seçki kampaniyasının müddətini 120 gün, təşviqat kampaniyasının müddətini 60 gün müəyyən etməkdir.
İndiki Seçki Məcəlləsinə görə, kampaniya müddəti 60 gün, təşviqat müddəti 23 gündür.
2008-ci ilə qədər təşviqat müddəti 60 gün olub. Həmin il müddət 28 günə, 2010-cu ildə 23 günə endirilib.
Novator.az-a açıqlamasında Zahid Oruc deyib ki, müxtəlif partiyalar, qeyri-hökumət təşkilatları, ayrı-ayrı vətəndaşlar vaxtaşırı seçki qanunvericiliyinin təkmilləşdirilməsi, dəyişdirilməsi yönündə təkliflər irəli sürürlər: “Bu, başa düşüləndir, çünki seçki prosesi dinamikdir və yeni təkliflərin verilməsi təqdirəlayiqdir. Lakin Müsavat Partiyası seçki və təşviqat kampaniyalarının müddətlərini artırmaq təklifini irəli sürəndə bunun konkret ictimai-siyasi əsaslarını göstərməyib. Seçki kampaniyasını 4 aya, təşviqat kampaniyasını isə 2 ayadək uzatmaqla vətəndaşların siyasi proseslərə fəal qoşulmasına nail olmaq mümkün deyil. Əksinə, bu, yorğunluğa, ləngliyə gətirib çıxaracaq. Ona görə də mən bu təklifin faydalı olduğunu düşünmürəm”.
Zahid Oruc onu da qeyd edib ki, Milli Məclisin gündəmində Seçki Məcəlləsinin dəyişdirilməsi məsələsi dayanmır: “Ancaq partiyalar öz təkliflərini irəli sürə bilərlər. Bu onların hüququdur və buna görə kimsə onları süngü ilə qarşılamır”.
Məleykə Ağayeva
