Azərbaycan neftinin qiyməti 60 dolları ötüb
Sentyabrın 26-sı Nyu-York birjasında “Layt” markalı neftin barreli 52,29 dollara, London birjasında “Brent” markalı neftin barreli 59,22 dollara satılır. “AzəriLayt” markalı neftin barreli isə 60,51 dollara təklif olunur.
Azərbaycanın 2017-ci il büdcəsində neftin qiyməti 40 dollar hesablanıb. Novator.az bildirir ki, bu ay Azərbaycan nefti 7 dollar bahalaşıb. Avqustun 31-də “AzəriLayt” markalı neftin bir barreli 53,51 dollar olub.
AZƏRTAC xəbər verir ki, ötən gün “Brent” markalı xam neftin qiyməti son 2 il 3 ayın maksimumuna çatıb. Sentyabrın 25-də “Brent”in bir barrelinə 59,25 dollar qiymət qoyulub. Bu, 2015-ci il iyulun 13-dən sonra ən yüksək göstərici olub.
Ekspertlərin fikrincə, qiymət artımına Türkiyənin İraqdakı kürd muxtariyyətindən neftin ixracını dayandırmaq niyyəti, eləcə də ABŞ-da şist neft quyularının sayının azalmağa başlaması və Beynəlxalq Enerji Agentliyinin dünyada neft ehtiyatlarının azaldığı ilə bağlı bəyanat yayması təkan verib.
