REAL qurultay təyin edib
Siyasi partiyaya çevrilmək istəyən Respublikaçı Alternativ (REAL) Hərəkatı oktyabrın 29-na təsis qurultayı təyin edib. Novator.az-ın məlumatına görə, təsis qurultayının keçirilməsi barədə qərarı sentyabrın 24-də partiya quruculuğu üzrə təşkilat komitəsi çıxarıb.
REAL Hərəkatı 2008-ci ildə yaradılıb. Partiya quruculuğu üzrə təşkilat komitəsi 2016-cı ilin martında elan olunub.
REAL-ın 47 yaşlı lideri İlqar Məmmədov Moskva Dövlət Universitetinin tarix fakültəsini bitirib. Budapeştdə yerləşən Mərkəzi Avropa Universitetində siyasi elmlər üzrə magistr dərəcəsinə yiyələnib. Beynəlxalq Valyuta Fondu və Dünya Bankının Bakı nümayəndəliklərində, ABŞ-ın Azərbaycandakı səfirliyində çalışıb. Beynəlxalq Böhran Qrupunun Azərbaycanda təmsilçisi, Avropa Şurasının Siyasi Biliklər Proqramının Azərbaycan üzrə direktoru olub. 5 il Milli İstiqlal Partiyası sədrinin müavini postunu tutub.
İlqar Məmmədov 2013-cü il fevralın 4-də, İsmayıllıda hökumət əleyhinə iğtişaşlar (23-24 yanvar 2013-cü il) təşkil etmək ittihamı ilə tutulub, 7 il azadlıqdan məhrumetmə cəzası alıb.
