Prezidentlərin bir araya gəlməsi müzakirə olunub
Xarici işlər naziri Elmar Məmmədyarov sentyabrın 23-ü Nyu-Yorkda ATƏT-in Minsk qrupunun həmsədrləri İqor Popov (Rusiya), Stefan Viskonti (Fransa), Endrü Skofer (ABŞ) və ATƏT sədrinin şəxsi nümayəndəsi Anjey Kasprşikin iştirakı ilə Ermənistanın xarici işlər naziri Edvard Nalbandyanla görüşüb. XİN-in mətbuat xidməti bildirir ki, görüşdə Dağlıq Qarabağ münaqişəsinin həlli üzrə ətraflı fikir mübadiləsi aparılıb, iki ölkənin və həmsədrlərin atmalı olduqları addımlar nəzərdən keçirilib.
Minsk qrupu həmsədrlərinin təklifinə uyğun olaraq Ermənistan və Azərbaycan prezidentlərinin görüşünün keçirilməsi ilə əlaqədar məsələlər müzakirə olunub.
Nazir Elmar Məmmədyarov münaqişənin həlli üzrə substantiv danışıqların davam etdirilməsi üçün həmsədrlərin səsləndirdiyi bir sıra maraqlı təkliflərə Azərbaycanın dəstək verdiyini bildirib. O həmçinin münaqişənin tezliklə həllinə nail olmaq üçün Azərbaycanın məntiqli danışıqlara daim hazır olduğunu bir daha vurğulayıb.
APA-nın məlumatına görə, həmsədrlərin görüşlə bağlı bəyanatında qeyd olunur ki, əsas məqsəd münaqişə zonasında mövcud vəziyyətlə bağlı müzakirələr aparmaq, danışıqlar prosesini gücləndirmək, Azərbaycan və Ermənistan prezidentləri arasında görüşün təşkilinin müzakirəsi olub: “Həmsədrlər ümid edirlər ki, yüksək səviyyəli görüşün keçirilməsi nizamlanmanın digər əsas məsələlər üzrə kompromis qərarların axtarışında tərəflər arasında etimad və siyasi iradənin möhkəmləndirilməsinə kömək edəcək. Nazirlər prezidentlərin yaxın gələcəkdə görüşünün təşkilində həmsədrlərlə əməkdaşlığa hazır olduqlarının ifadə ediblər”.
