Ölkə ərazisinin 12 faizə yaxını meşədir
Ekologiya və Təbii Sərvətlər Nazirliyi ötən il təsdiqlənmiş Azərbaycan Respublikasının milli iqtisadiyyat perspektivi üzrə strateji yol xəritəsinə uyğun olaraq aqromeşə massivlərinin salınmasına başlayıb. AZƏRTAC-a danışan Meşələrin İnkişafı Departamentinin sektor müdiri Sadiq Salmanov deyib ki, həyata keçirilən tədbirlər əhalinin sosial vəziyyətinin yaxşılaşdırılması və ərzaq təhlükəsizliyinin təmin edilməsi məqsədi daşıyır: “Artıq müxtəlif növ və cinslərdən ibarət 2001 hektar sahədə yeni aqromeşə massivləri salınıb. Cari ildə də bu işlər davam etdirilir. Ümumiyyətlə, 2017-2021-ci illərdə 22 min hektar ərazidə yeni meşə massivlərinin salınması nəzərdə tutulub”.
Salmanovun sözlərinə görə, əkin işləri əsasən yaz və payızda aparılır: “Doqquz ay ərzində 1606 hektar ərazidə yeni aqromeşə massivləri salınıb. Cari ildə indiyə kimi 2 milyona yaxın ağac əkilib. Qoz, badam, fındıq, alma, ərik və baramaçılığın inkişafı üçün nəzərdə tutulmuş tut ağacları üstünlük təşkil edib. Payız mövsümündə isə 2300 hektar ərazidə 1 milyona yaxın ağac əkilməsi planlaşdırılıb”.
Sektor müdiri qeyd edib ki, meşə fondu torpaqları ölkə ərazisinin 14 faizini təşkil edir: “Meşə ilə örtülü ərazilər isə 11,8 faizə bərabərdir. Son 15 il ərzində meşəbərpa tədbirləri 2,5 dəfə artırılıb. Nəticədə meşə ilə örtülü ərazilərin sahəsində 0,4 faiz artım qeydə alınıb”.
