E-gov.az-da yeni xidmətlər
Əmlak Məsələləri Dövlət Komitəsinin (ƏMDK) daha 3 xidməti “Elektron hökumət” portalına (www.e-gov.az) əlavə olunub. Bununla ƏMDK-nin portalda təqdim olunan xidmətlərinin sayı 35-ə çatıb.
Komitənin “Çoxmərtəbəli yaşayış binasında daşınmaz əmlakın dövlət reyestrindən çıxarış almış mənzillərin mövcudluğu barədə məlumatların verilməsi” xidməti vasitəsilə vətəndaş ölkə üzrə şəhər, rayon, qəsəbə və ya kənd, küçənin adını, həmçinin tikinti şirkətinin adını qeyd etməklə mənzillərin dövlət reyestrindən çıxarışının mövcud olub-olmadığı haqda məlumat əldə edir.
“Mənzillərin alğı-satqı müqavilələri üzrə satış qiymətləri barədə məlumatların verilməsi” xidməti üzrə vətəndaş ünvanı göstərməklə həmin ərazidə mənzillərin alğı-satqı müqavilələri üzrə satış qiymətləri barədə məlumatları ala bilər. Hər iki xidmət üçün ödəniş tələb olunur.
İstənilən ərazidə çöl-ölçmə işlərini aparmaq və ərazinin koordinatlarını müəyyən etmək istəyən qurum AZPOS (Azerbaijan Positioning Observation System) vasitəsilə göstərilən xidmətlərdən yararlanmaq imkanına malikdir.
Portala inteqrasiya olunan üçüncü xidmət AZPOS sisteminə qoşulma üçün müraciəti və sənədlərin qəbulunu ehtiva edir.
AZPOS Azərbaycan ərazisində geodeziya-ölçü işlərində tətbiq olunan yüksək dəqiqliyə malik qəbuledicilərin köməyi ilə koordinatları müəyyən edən informasiya sistemidir.
