Büdcə zərfi prezidentə ötürüldü
Nazirlər Kabinetində 2018-ci ilin dövlət büdcəsinin və icmal büdcənin layihələri, sonrakı üç il üçün icmal büdcənin göstəriciləri, Azərbaycanın 2018-ci il və gələn üç il üzrə iqtisadi və sosial inkişaf konsepsiyası və proqnoz göstəriciləri, habelə büdcə zərfinə daxil olan normativ hüquqi sənədlərin layihələri müzakirə olunub. Sentyabrın 21-də keçirilən iclasa baş nazir Artur Rasizadə sədrlik edib.
Rəsmi məlumata görə, iclasda maliyyə naziri Samir Şərifovla iqtisadiyyat naziri Şahin Mustafayevin məruzələri dinlənib. Çıxışlarda qeyd olunub ki, büdcə layihəsinin hazırlanmasında dövlət büdcəsinin sosial yönümü əsas götürülüb, əhalinin maddi rifahının yaxşılaşdırılması, dövlətin müdafiə qüdrətinin və təhlükəsizliyinin təmin edilməsi, xüsusən qeyri-neft sektorunun inkişafına dəstək verilməsi kimi mühüm amillərə diqqət yetirilib.
Büdcə layihəsi ətrafında aparılan geniş müzakirələrin yekununda əlaqədar nazirlik, komitə, idarə və təşkilatlarla birlikdə müvafiq dövlət proqramları əsasında hazırlanan büdcə zərfinin prezidentə təqdim olunması qərara alınıb.
Novator.az xatırladır ki, 2017-ci ilin dövlət büdcəsinin xərcləri 17 milyard 941 milyon manat, gəlirləri 16 milyard 766 milyon manat proqnozlaşdırılır (Büdcə) .
