Prokurorluq universitetinin məsul şəxsləri barədə cinayət işi başlayıb
Prokurorluq Azərbaycan Dövlət İqtisad Universitetinin məsul şəxslərinə cinayət işi başlayıb.
Hesablama Palatasının sentyabrın 19-da yaydığı məlumatda bildirilib ki, universitetdə aparılan audit nəticəsində 2012-2014-cü illərdə təhsil haqqı üzrə daxilolmaların uçotunun aparılması, təhsil haqlarının yığılması və universitetin bank hesabına köçürülməsi sahəsindəki nöqsanların ciddiliyi, eləcə də təhsil haqqı üzrə debitor-kreditor borclarının uçotdan yayındırılması nəzərə alınaraq materiallar Baş Prokurorluğa göndərilib.
Sentyabrın 21-də Baş Prokurorluq bəyan edib ki, Hesablama Palatasından daxil olan material Korrupsiyaya Qarşı Mübarizə Baş İdarəsində araşdırılıb, yoxlama dövrünü əhatə edən 18 may 2012-ci il-dən 1 aprel 2014-cü ilə qədər olan dövrdə universitetin vəzifəli və digər məsul şəxslərinin təhsil haqlarının uçotu, yığılması və bank hesabına köçürülməsi, təhsil haqqı üzrə debitor-kreditor borclarının uçotda əks etdirilməsində ciddi qanun pozuntularına yol verdiyi, külli miqdarda vəsaiti uçotdan yayındırdığı üzə çıxıb. Cinayət Məcəlləsinin 308.2-ci (vəzifə səlahiyyətlərindən sui-istifadə ağır nəticələrə səbəb olduqda) və 179.3.2-ci (şəxs tərəfindən öz qulluq mövqeyindən istifadə etməklə külli miqdarda etibar edilmiş özgə əmlakını talama) maddələri ilə cinayət işi başlanıb. Təqsirli şəxslərin dairəsinin müəyyənləşdirilərək məsuliyyətə cəlb olunması, habelə vurulmuş ziyanın ödənilməsi istiqamətində zəruri istintaq-əməliyyat tədbirləri davam etdirilir.
