General-polkovnik ordenlə təltif olundu
Prezident İlham Əliyev Dövlət Sərhəd Xidmətinin rəisi Elçin Quliyevi “Azərbaycan Bayrağı” ordeni ilə təltif edib. Sentyabrın 21-də imzalanan sərəncamda təltif Elçin Quliyevin Azərbaycanın dövlət sərhədinin mühafizəsində xüsusi xidmətləri ilə əsaslandırılıb.
Novator.az bildirir ki, Elçin Quliyevin 50 yaşı tamam olur.
Elçin Quliyev 1967-ci il sentyabrın 22-si Sumqayıtda anadan olub. Bakı Ali Birləşmiş Komandanlıq Məktəbini bitirib. 1988-1992-ci illərdə SSRİ Silahlı Qüvvələrində xidmət edib, 1992-ci ildən Xudat əlahiddə nəzarət buraxılış məntəqəsinin rəisi, 1996-cı ildən Xudat sərhəd dəstəsinin rəisi vəzifələrində çalışıb. 27 mart 2001-ci ildə milli təhlükəsizlik nazirinin müavini-Sərhəd Qoşunlarının komandanı təyin edilib. 31 iyul 2002-ci ildən Dövlət Sərhəd Xidmətinin rəisi-Sərhəd Qoşunlarının komandanı olub.
Bu il iyunun 5-də prezident İlham Əliyev Dövlət Sərhəd Xidmətinin əsasnaməsinin və strukturunun dəyişdirilməsi haqda fərman imzalayıb. Fərmana əsasən, Dövlət Sərhəd Xidməti rəisindən Sərhəd Qoşunlarının komandanı statusu alınıb.
Dövlət başçısı hələ ki, Sərhəd Qoşunlarının komandanı postuna yeni təyinat etməyib.
