Yeni neft sazişinin detalları
AZƏRTAC sentyabrın 14-ü Bakıda imzalanmış yeni neft sazişinin detallarını açıqlayıb.
Xəzər dənizinin Azərbaycan sektorunda Azəri, Çıraq yataqlarının və Günəşli yatağının dərinlikdə yerləşən hissəsinin birgə işlənməsi və neft hasilatının pay bölgüsü haqqında düzəliş edilmiş və yenidən tərtib olunmuş sazişi Azərbaycan hökumətinin, SOCAR-ın, BP, “Chevron”, “İnpex”, “Statoil”, “ExxonMobil”, “TP”, “İtochu” və “ONGC Videsh” şirkətlərinin rəsmiləri imzalayıblar.
Saziş Azəri-Çıraq-Günəşlinin (AÇQ) işlənməsini 2050-ci ilə qədər uzadır. Sənədə əsasən, SOCAR-ın AÇG-dəki iştirak payı 11,65 faizdən 25 faizə qaldırılacaq və beynəlxalq tərəfdaş şirkətlər Dövlət Neft Fonduna 3,6 milyard dollar bonus ödəyəcəklər. Azərbaycana çatacaq mənfəət neftinin səviyyəsi isə 75 faiz təşkil edəcək. Növbəti 32 il müddətində AÇG-yə 40 milyard dollardan çox sərmayə qoyulması potensialı var. Saziş Milli Məclisdə ratifikasiya olunmalıdır.
Hasilatın pay bölgüsü haqqında dəyişdirilmiş və yenidən işlənmiş sazişə görə, BP layihənin operatoru olaraq qalacaq. AÇG-də tərəfdaşların yeni iştirak payları bu nisbətdə olacaq: BP – 30,37 faiz, “AzACG” (SOCAR) – 25 faiz, “Chevron”- 9,57 faiz, “İnpex” – 9,31 faiz, “Statoil” – 7,27 faiz, “ExxonMobil” – 6,79 faiz, “TP” – 5,73 faiz, “İtochu” – 3,65 faiz və “ONGC Videsh Limited” (OVL) – 2,31 faiz.
Yeni sazişdən əvvəl AÇG-də iştirak payları belə olub: BP (operator – 35,8 faiz), SOCAR (11,6 faiz), “Chevron” (11,3 faiz), “İnpex” (11 faiz), “Statoil” (8,6 faiz), “ExxonMobil” (8 faiz), “TP” (6,8 faiz), “İtochu” (4,3 faiz), “ONGC Videsh Ltd.” (OVL) (2,7 faiz).
