Nazirlikdən elektron xidmət hesabatı
Bu ilin 8 ayında Əmək və Əhalinin Sosial Müdafiəsi Nazirliyinin elektron xidmətlərinə 6,5 milyona yaxın müraciət qeydə alınıb. Rəsmi məlumatda qeyd olunur ki, nazirliyin 30-a yaxın elektron xidməti əhalinin istifadəsindədir. Ötən ay e-xidmətlərə 516 min 152, cari ilin yanvar-avqust aylarında isə 6 milyon 486 min 533 dəfə üz tutulub.
Avqust ayında “Ünvanlı sosial yardımla bağlı müraciətin edilməsi” e-xidmətinə 87,3 min dəfə müraciət edilib, “Tibbi-Sosial Ekspert Komissiyasında sonuncu müayinəyə dair məlumatın verilməsi”, “Tibbi-Sosial Ekspert Komissiyaları tərəfindən keçirilmiş müayinə barədə məlumatın verilməsi” e-xidmətlərinə 30 minə yaxın müraciət olub.
2014-cü ilin iyul ayından istifadəyə verilən Əmək Müqaviləsi Bildirişi üzrə Elektron İnformasiya Sisteminə indiyədək 9 milyon 371 min müraciətin edildiyi bildirilir. Bu, “Elektron hökumət” portalına ümumi müraciətlərin 17,4 faizi deməkdir.
