Meriyanın Milli Şuradan istəyi var
Bakı Şəhər İcra Hakimiyyəti Demokratik Qüvvələrin Milli Şurasının mitinqini sanksiyalaşdırıb. Mitinq sentyabrın 23-ü saat 15-dən 17-dək Yasamal rayonundakı İdman-Sağlamlıq Kompleksinin stadionunda (“İnşaatçılar” metro stansiyasının yanı) keçiriləcək.
Aksiyanın korrupsiyaya, insan hüquqlarının tapdanmasına etiraz məqsədi daşıdığı bildirilir.
Bakı Şəhər İcra Hakimiyyəti Başçısı Aparatının şöbə müdiri Zaur Ramazanovun mitinqin təşkilatçılarına sentyabrın 20-də ünvanlandığı məktubda ayrı-seçkiliyə, ədavətə və ya zorakılığa çağırışlarla müşayiət olunan şüarlardan istifadə olunmaması xahişi yer alır.
Novator.az bildirir ki, Milli Şura 2013-cü ildə yaradılıb. Qurumun fəaliyyətinə rəhbərlik edən Koordinasiya Mərkəzində Cəmil Həsənli, Əli Kərimli, Gültəkin Hacıbəyli, Eldəniz Quliyev, Tofiq Yaqublu, Rövşən Əhmədli, İbrahim İbrahimli və başqa müxaliflər təmsil olunur.
