Müdafiə naziri Ermənistanla sərhədə baş çəkib
Müdafiə Nazirliyinin rəhbərliyi Azərbaycan-Ermənistan sərhədi istiqamətindəki bölmələrə baş çəkib. Mod.gov.az-ın 19 sentyabr məlumatına görə, dağlıq ərazidə və çətin iqlim şəraitində döyüş növbəsi çəkən şəxsi heyətlə görüşən müdafiə naziri Zakir Həsənova mövcud vəziyyət məruzə edilib. Dövlət sərhədinin etibarlı müdafiəsinin, dayanıqlığının düzgün təşkil olunmasını yoxlayan nazir şəxsi heyətin hazırlığını yüksək qiymətləndirib. Zakir Həsənov dövlət sərhədi istiqamətində üzbəüz yerləşən düşmən mövqelərini müşahidə edib.
Müdafiə naziri hərbi qulluqçuların döyüş və mənəvi-psixoloji hazırlığı, onların sosial-məişət şəraiti ilə maraqlanıb. Bildirilib ki, ön xətdə yerləşən bölmələr içməli su, istilik, yuyunma otaqları, isti yataq və digər lazımi qış ləvazimatları ilə tam təmin olunub.
Bir qrup hərbçiyə qiymətli hədiyyələr təqdim edildikdən sonra birgə nahar təşkil edilib.
Sonra qoşunların qarşıdurma xəttinə yaxın ərazidə yerləşən kəndlərə gələn Müdafiə Nazirliyinin rəhbərliyi yerli sakinlərlə görüşüb, onların qayğıları, problemləri və təhlükəsizlik məsələləri ilə maraqlanıb.
