Dövlət Miqrasiya Xidmətinin aylıq hesabatı
Bu ilin avqust ayında Dövlət Miqrasiya Xidməti əcnəbilərin və vətəndaşlığı olmayan şəxslərin qanunvericiliyin tələblərini pozması ilə bağlı 2837 qərar qəbul edib. Rəsmi hesabata görə, qərarların 272-si ölkə ərazisində yaşamağın leqallaşdırılmasını, 1375-i inzibati cəriməni, 969-u ölkə hüdudlarından kənara çıxarılmaqla cərimə tətbiqini, 197-si ölkə ərazisinə gəlişi məhdudlaşdırmağı, 24-ü müvəqqəti və daimi yaşamaq üçün sənədin yeni sənədlə əvəz olunmasını nəzərdə tutur.
Ötən ay Dövlət Miqrasiya Xidmətinə əcnəbilər və vətəndaşlığı olmayan şəxslərdən ölkədə müvəqqəti olma müddətlərinin uzadılması, müvəqqəti və daimi yaşamaq üçün icazələrin alınması, vətəndaşlığa qəbul, xitam, bərpa, eləcə də vətəndaşlıq mənsubiyyətinin və qaçqın statusunun müəyyənləşdirilməsi, həmçinin əmək fəaliyyətinin həyata keçirilməsi üçün iş icazələrinin alınması və mövcud iş icazələrinin müddətlərinin uzadılması ilə bağlı 7181 müraciət daxil olub.
Hesabat dövrü ərzində olduğu yer üzrə 113982 əcnəbi və vətəndaşlığı olmayan şəxsin müraciəti qeydə alınıb.
