Cəbhə bölgəsindən yeniliklər
Mod.gov.az-ın 19 sentyabr məlumatına görə, müdafiə naziri Zakir Həsənov və nazirliyin digər rəhbər heyəti Hava Hücumundan Müdafiə qoşunlarının cəbhə zonasında yerləşən bölmələrinin birində yeni inşa edilmiş yaşayış kompleksinin açılışında iştirak edib, hərbi qulluqçular üçün yaradılmış şəraitlə maraqlanıblar.
Nazirliyin rəhbərliyi ərazidəki əsgər yataqxanası, yeməkxana, sinif otaqları, mətbəx, ərzaq və əşya anbarları, qazanxana eləcə də digər xidməti və inzibati obyektlərlə tanış olub.
Zakir Həsənov mövqelərdə olan döyüş texnikasına baxış keçirib, mühüm dövlət və hərbi obyektlərin hava zərbələrindən müdafiəsi məqsədilə qoşunların fəaliyyəti və digər məsələlərlə bağlı tapşırıqlar qoyub.
Sentyabrın 18-də yayılmış rəsmi məlumatlarda isə deyilir ki, Müdafiə Nazirliyinin rəhbərliyi genişmiqyaslı təlimlərin keçirildiyi bölgədəki hərbi hissədə olub. Zakir Həsənov qoşun növlərinin komandanları, birlik komandirləri və müvafiq vəzifəli şəxslərin ümumqoşun əməliyyatlarının aparılması zamanı fəaliyyətlərin təşkili üzrə qəbul edilən qərarlara dair məruzələrini dinləyib. Əsas diqqət mürəkkəb dağlıq relyef və radioelektron mübarizə şəraitində kəşfiyyat, maskalanma, istehkam, atəşlə zərərvurma və digər döyüş təminatı məsələlərinə yönəldilib.
Qarşılıqlı fəaliyyətin effektivliyinin artırılması, döyüş tapşırıqlarının aydınlaşdırılması, vəziyyətin qiymətləndirilməsi və qərarın məruzəsindən sonra qoşunların idarə olunması üzrə müvafiq göstərişlər verilib.
Həmin gün Zakir Həsənov və nazirliyin digər rəhbər heyəti Hərbi Hava Qüvvələrinin cəbhə bölgəsindəki hərbi hissəsinin ərazisində yeni inşa edilmiş yaşayış kompleksinin açılışına qatılıb. Nazirliyin rəhbərliyi həmçinin ərazidəki əsgər yataqxanası, yeməkxana, sinif otaqları, mətbəx, ərzaq və əşya anbarları, qazanxana eləcə də digər xidməti və inzibati obyektlərə baxış keçirib.
Sonra Zakir Həsənov hərbi hissənin silahlanmasındakı döyüş texnikasına baxış keçirib və komandanlıq qarşısında müvafiq tapşırıqlar qoyub.
