55 min manata təklif olunan obyektə 93 min manat verilib
Sentyabrın 19-da Əmlak Məsələləri Dövlət Komitəsi özəlləşdirmə hərracı keçirib. Özəlləşdirilən əmlaklardan 4-ü kiçik dövlət müəssisəsi, 17-si istifadəsiz qeyri-yaşayış sahəsi, 1-i yarımçıq tikilidir.
Rəsmi məlumata görə, hərrac rəqabətli keçib. Paytaxtın Nəsimi rayonunda yerləşən, ümumi faydalı sahəsi 115 kvadratmetrə yaxın olan qeyri-yaşayış sahəsinin start qiyməti 55 min manat olub, obyekt 93 min manata özəlləşdirilib. İstifadəsiz qeyri-yaşayış sahələri arasında ən yüksək satış qiyməti bu əmlakda qeydə alınıb.
Hərracda ən yüksək qiymətə özəlləşdirilən kiçik dövlət müəssisəsi Sumqayıt şəhərində yerləşən 133 saylı yanacaqdoldurma məntəqəsi olub.
