“Turan” hələ işləyə bilmir
Sentyabrın 18-də “Turan” informasiya agentliyinin bank hesabları açılıb. Hesablar dondurulduğu, direktor Mehman Əliyev həbs olunduğu üçün agentlik sentyabrın 1-dən fəaliyyətini dayandırmaq məcburiyyətində qalıb. Novator.az bildirir ki, ayın əvvəllərində “Turan”ın əməkdaşları ilə əmək müqavilələri ləğv olunub və Bakıda, Süleyman Rəhimov küçəsi, 186 ünvanında yerləşən ofis çalışmır.
Avqustun 25-də qanunsuz sahibkarlıq, vergidən yayınma və vəzifə səlahiyyətlərindən sui-istifadə ittihamları ilə barəsində 3 aylıq həbs qətimkan tədbiri seçilən Mehman Əliyev sentyabrın 11-də azadlığa buraxılıb. Ona Azərbaycanı tərk etməmək şərti qoyulub.
Sentyabrın 15-də Bakı Şəhər Lokal Gəlirlər Departamenti “Turan” informasiya agentliyinə 2014-2016-cı illər üzrə kəsdiyi 37 min manat əlavə vergi sanksiyasını ləğv edib.
Bununla belə, agentlik bəyan edir ki, Vergilər Nazirliyində “Turan”a qaldırılan cinayət işinə xitam verilib-verilmədiyi hələ bilinmir. Agentlik bu haqda rəsmi bilgi almayıb. Ona görə də “Turan”ın fəaliyyətini bərpa etməsi üçün hələ şərait yaradılmayıb. Əməkdaşlar volontyor kimi fəaliyyət göstərir, agentliyin saytı (www.turan.az) yenilənir.
