Məhkəmə vəkildən şikayət verib
Vəkil Elçin Sadıqovdan Vəkillər Kollegiyasına şikayət olunub. Novator.az-ın məlumatına görə, Elçin Sadıqov özü sosial şəbəkədə belə açıqlama yayıb. O yazır ki, Vəkillər Kollegiyasına müraciət jurnalist Elçin İsmayıllının Şəki Ağır Cinayətlər Məhkəməsində keçirilmiş mühakiməsi ilə bağlıdır. Məhkəmə vəkili müdafiə hüququnu kobud şəkildə pozmaqda, orderin tarixini dəyişməməkdə günahlandırır.
Sentyabrın 18-də Şəki Ağır Cinayətlər Məhkəməsində “Azadlıq” qəzetinin bölgə müxbiri Elçin İsmayıllıya 9 il azadlıqdan məhrumetmə cəzası verilib. Jurnalist hədə-qorxu ilə tələb etmə və vəzifə səlahiyyətlərindən sui-istifadədə təqsirli bilinib. Prosesə hakim Rəşid Hüseynov sədrlik edib.
Elçin Sadıqov bir müddət əvvəl jurnalistin işi ilə problem yaşadığını açıqlamışdı. Vəkil bildirmişdi ki, Şəki Ağır Cinayətlər Məhkəməsi ona hazırlıq iclası ilə bağlı bildiriş göndərməyib. Elçin Sadıqov hazırlıq iclasının təxirə salınmasını istəsə də, tələbi qəbul edilməyib, iclas keçirilib. Vəkil jurnalisti müdafiə etmək hüququ verən orderi hakimə təqdim etsə də, ondan sənədin tarixini dəyişdirmək tələb olunub. Elçin Sadıqov qanunsuz saydığı bu tələbə əməl etməyib.
36 yaşlı Elçin Sadıqov 2006-cı ildən vəkillik fəaliyyəti ilə məşğuldur.
