Kommunikasiya hesabatı
Dövlət Statistika Komitəsi kommunikasiya hesabatı yayıb. Novator.az-ın məlumatına görə, hesabatda qeyd olunur ki, nəqliyyat sektorunda fəaliyyət göstərən müəssisələr və fiziki şəxslər 2017-ci ilin yanvar-avqust aylarında 150,1 milyon ton yük və 1 milyon 262,4 milyon sərnişin daşıyıb. Əvvəlki ilin müvafiq dövrü ilə müqayisədə yük daşınması 1,9 faiz, sərnişin daşınması isə 2,3 faiz artıb. Yüklərin 64 faizi avtomobil, 26 faizi boru kəməri, 6,3 faizi dəmir yolu, 3,6 faizi dəniz, 0,1 faizi isə hava nəqliyyatının üzərinə düşüb.
Sərnişinlərin 88 faizinin avtomobillə, 11,8 faizi metroda, qalanlarının hava və dəniz nəqliyyatı vasitələri ilə daşındığı bildirilir.
Hesabata əsasən, informasiya və rabitə müəssisələrinin göstərdiyi 1 milyard 109,9 milyon manatlıq xidmətlərin 72,3 faizi əhali sektoruna aid olub. 2016-cı ilin müvafiq dövrü ilə müqayisədə 2017-ci ilin yanvar-avqust aylarında göstərilmiş informasiya və rabitə xidmətlərinin həcmi dəyər ifadəsində 5,1 faiz artıb, bu sahədə əldə edilmiş gəlirin 81,1 faizi qeyri-dövlət sektorunun payına düşüb.
Avqust ayında nəqliyyat xidmətləri əvvəlki ayla müqayisədə 0,7 faiz, o cümlədən sərnişindaşıma xidmətləri 3,2 faiz, yükdaşıma xidmətləri 0,3 faiz bahalaşıb.
Ay ərzində poçt, kuryer və rabitə xidmətlərinin qiymətlərində əvvəlki ayla müqayisədə dəyişiklik müşahidə olunmayıb.
