Azərbaycanlı nazirin erməni ağrısı üzə çıxıb
Bu ayın əvvəlində Azərbaycanda səfərdə olan Kanadanın Ontario vilayətinin tədqiqat, innovasiya və elm naziri Reza Moridi Ermənistanda “soyqırımı” abidəsini ziyarət edib, “soyqırımı” muzeyinin xatirə kitabına ürək sözlərini yazıbmış.
Saxta soyqırımı iddialarına görə, 1915-ci il aprelin 24-dən başlayaraq 1923-cü ilə kimi Türkiyədə 1 milyon 500 min nəfər erməni öldürülüb.
Novator.az bildirir ki, Reza Moridinin “soyqırımı ağrısı” onun Azərbaycana səfərindən sonra üzə çıxıb.
Reza Moridi sentyabrın 5-6-da Bakı Dövlət Universitetində, Azərbaycan Milli Elmlər Akademiyasının Yüksək Texnologiyalar Parkında, Azərbaycan Milli Elmlər Akademiyasının Rəyasət Heyətində görüşlər keçirib, Azərbaycanın təhsil naziri Mikayıl Cabbarovun qəbulunda olub.
Ölkəmizi tərk edəndən sonra – sentyabrın 11-də o, özünün Facebook səhifəsində Yerevan səfərindən fotoşəkillər paylaşıb. Nazir şəkillərin üstündən yazıb ki, ona avqustun 23-də Yerevanda erməni soyqırımı muzeyini və memorialını ziyarət edib, bir əsrdən çox əvvəl faciəli surətdə həlak olmuş insanların xatirəsini anmaq və xatirə kitabını yazmaq şərəfi nəsib olub. Facebook qeydində nazir muzeyin direktor müavini Suren Manukyana minnətdarlığını da ifadə edib.
Reza Moridi (Rza Müridi) əslən azərbaycanlıdır. O, 1945-ci ildə Güney Azərbaycanın Urmiya şəhərində doğulub. Orta və ali təhsilini İran paytaxtı Tehranda alıb. Sonra təhsilini Böyük Britaniyada davam etdirib. Fizika üzrə fəlsəfə doktorudur.
2013-cü ildən Kanadanın Ontario vilayətinin tədqiqat, innovasiya və elm naziridir.
