Azərbaycan və Türkiyə aviasiyasının birgə təlimləri başlayıb
Sentyabrın 18-də Azərbaycan və Türkiyə Hərbi Hava Qüvvələrinin “TurAz Qartalı – 2017” birgə taktiki-uçuş təlimləri başlayıb. Ayın son gününədək davam edəcək təlimlərə iki ölkənin Hərbi Hava Qüvvələrinə məxsus MiQ-29, F-16, Su-25, C-130 Herkules, CASA CN-235 təyyarələri və Mi-35, Mi-17, Sikorski S-70 helikopterlərindən ibarət 30-dək aviasiya vasitəsi cəlb olunub.
Rəsmi açıqlamaya görə, təlimlərdə Hərbi Hava Qüvvələrinin müştərək fəaliyyətlərinin planlaşdırılması, əməliyyatların keçirilməsi üzrə qarşılıqlı fəaliyyət, döyüş uzlaşması imkanlarının öyrənilməsi, axtarış-xilasetmə tədbirlərinin icrası, havadan zərbələr endirməklə yer hədəflərinin məhv edilməsi və digər tapşırıqlar yerinə yetiriləcək.
