“Turan” cərimədən çıxır
Bakı Şəhər Lokal Gəlirlər Departamenti “Turan” informasiya agentliyinə 2014-2016-cı illər üzrə kəsdiyi 37 min manat əlavə vergi sanksiyasını ləğv edib. Qərar kameral yoxlamanın yekunu əsasında çıxarılıb.
“Turan” qeyd edir ki, 2014-2016-cı illər üzrə əlavə vergi qərarı 7 avqust 2017-ci ildə Vergi Cinayətlərinin İbtidai Araşdırılması Departamentinin agentliyə cinayət işi başlamasına əsas verib. Avqustun 16-da agentliyin ofisində axtarış aparılıb, mühasibat sənədləri və maliyyə fəaliyyəti ilə bağlı elektron daşıyıcılar götürülüb. İki gün sonra vergi yoxlamasını 1 iyul 2010-cu ildən 1 iyul 2017-ci ilə qədər genişləndirmək qərarı verilib.
Avqustun 24-də agentliyin direktoru Mehman Əliyev Vergilər Nazirliyinin “Turan”dakı yoxlamaları zəminində tutulub. Avqustun 25-də Yasamal Rayon Məhkəməsi onu 3 aylıq həbs edib. Qərar Vergi Cinayətlərinin İbtidai Araşdırılması Departamentinin təqdimatı əsasında çıxarılıb. Mehman Əliyev qanunsuz sahibkarlıq, vergidən yayınma və vəzifə səlahiyyətlərindən sui-istifadədə ittiham olunub.
İstintaq iddia edib ki, Mehman Əliyev 2010-2014-cü illərdə dövlət qeydiyyatına alınmamış qrant müqavilələri üzrə 148310 manat məbləğində qanunsuz gəlir əldə edib, 2010-2016-cı illərdə 60080 manat məbləğində mənfəət vergisini dövlət büdcəsinə ödəməkdən yayınıb.
Vergi ödəməkdən yayınma üzrə cinayət işi çərçivəsində “Turan”ın hesabları dondurulub, agentliyin fəaliyyəti dayanıb.
Yasamal Rayon Məhkəməsi sentyabrın 11-də Mehman Əliyevi həbsdən buraxıb. Mehman Əliyev barədə başqa yerə getməmək haqqında iltizam qətimkan tədbiri seçilib.
“Turan” vergi ödənilməməsi barədə ittihamları təkzib edir və 2010-2016-cı illər üzrə əlavə vergi hesablanmasının əsassız sayılması üçün 1 saylı Bakı İnzibati-İqtisadi Məhkəməsinə şikayət verib. Şikayət üzrə dinləmələr sentyabrın 27-nə təyin olunub.
Agentliyin yeni məlumatında bildirilir ki, Lokal Gəlirlər Departamenti cinayət işi başlanmasına səbəb olan 37 min cərimə qərarını ləğv etdiyi üçün ittihamların hüquqi bazası qalmır.
