Təhsil statistikası
Sentyabrın 15-də yeni tədris ili başlayıb. AZƏRTAC xəbər verir ki, 2017-2018-ci tədris ilində ümumtəhsil məktəblərində 164 min 945 şagird birinci sinfə gedir. On birinci sinif şagirdlərinin sayı isə 87 min nəfərdir. Ölkədə 4 min 457 ümumtəhsil məktəbi fəaliyyət göstərir, bu müəssisələrdə 1 milyon 455 min 49 nəfər təhsil alır.
Bu il 71 məktəb inşa edilib, 12 ümumtəhsil müəssisəsində əsaslı təmir aparılıb, 460 məktəbdə cari təmir işləri görülüb, 24-də işlər davam etdirilir.
241 adda 4 milyon 563 min 416 nüsxə dərslik və müəllimlər üçün metodik vəsait çap edilərək yerlərə çatdırılıb.
Bu il müəllimlərin işə qəbulu üzrə müsabiqədə 4 minə yaxın namizəd müəllim adı qazanıb. Onlardan 651-i Bakıdakı məktəblərdə müvafiq işlə təmin edilib. Tətbiq olunan yeniliyə əsasən, müsabiqə yolu ilə işə qəbul olunan müəllimlər diaqnostik qiymətləndirmədən keçirilməyəcək. Dövlət başçısının 23 avqust 2017-ci il sərəncamı ilə onların əməkhaqqı gələn ilin yanvarından orta hesabla 30-40 faiz artımla ödəniləcək.
2017-ci ildə 500-dən yuxarı bal toplayan 1300 abituriyent müəllimlik ixtisasını seçib. Ümumilikdə son dörd ildə tələbələrin sayı 11,6 faiz artıb. Bu il qəbul imtahanlarında abituriyentlərdən 36 min 428-i tələbə adını qazanıb. 42 ali təhsil ocağının 5-də plan yerləri 100 faiz dolub. Qəbul imtahanlarında 2 min 464 nəfər 600 baldan yuxarı nəticə göstərib. On beş abituriyent isə 700 bal toplayıb.
