Sərmayədə 0,1 faiz artım var
Dövlət Statistika Komitəsi sərmayə hesabatı yayıb. Novator.az-ın məlumatına görə, hesabatda bildirilir ki, yanvar-avqust aylarında ölkənin iqtisadi və sosial sahələrinin inkişafı üçün əsas kapitala 9 milyard 868,5 milyon manat və ya əvvəlki ilin 8 ayı ilə müqayisədə 0,1 faiz çox vəsait yönəldilib.
Sərmayənin 5 milyard 969,9 milyon manatı neft sektoruna, 3 milyard 898,6 milyon manatı qeyri-neft sektoruna qoyulub, 72,9 faizi bilavasitə tikinti-quraşdırma işlərinə sərf edilib.
İstifadə olunmuş vəsaitin 78,7 faizi məhsul istehsalı obyektlərinin, 16 faizi xidmət sahələri üzrə obyektlərin, 5,3 faizi isə yaşayış evlərinin tikintisinin payına düşüb.
Daxili mənbələrdən əsas kapitala yönəldilmiş vəsait ümumi sərmayənin 39 faizini təşkil edib.
Sərmayənin ümumi dəyərində müəssisə və təşkilatların vəsaitləri 69,8 faiz, bank kreditləri 11,8 faiz, büdcə vəsaitləri 11,8 faiz, əhalinin şəxsi vəsaitləri 4,5 faiz, büdcədənkənar fondların vəsaitləri 1,4 faiz, sair vəsaitlər 0,7 faiz olub.
