Milli Şura mitinq təyin etdi
Müxalif Demokratik Qüvvələrin Milli Şurası Bakıda kütləvi aksiya keçirmək qərarı verib. Qurumun Koordinasiya Mərkəzinin qərarı ilə mitinq sentyabrın 23-ü saat 15-ə, Yasamal rayonundakı İdman-Sağlamlıq Kompleksinin stadionuna (“İnşaatçılar” metro stansiyasının yanı) təyin edilib.
Milli Şuranın liderlərindən olan AXCP sədri Əli Kərimli internetdə yaydığı videomüraciətdə aksiyanın korrupsiyaya, insan hüquqlarının tapdanmasına etiraz məqsədi daşıdığını deyib, sosial şüarlar səsləndiriləcəyini, siyasi məhbuslara azadlıq tələbi qoyulacağını vurğulayıb.
Novator.az bildirir ki, Milli Şura 2013-cü ildə yaradılıb. Qurumun fəaliyyətinə rəhbərlik edən Koordinasiya Mərkəzində Cəmil Həsənli, Əli Kərimli, Gültəkin Hacıbəyli, Eldəniz Quliyev, Tofiq Yaqublu, Rövşən Əhmədli, İbrahim İbrahimli və başqa müxaliflər təmsil olunur.
Demokratik Qüvvələrin Milli Şurasının əsas məramı Azərbaycanda xalqın hakimiyyətin mənbəyi olmasını, hakimiyyətin qanunverici, icra və məhkəmə qolları arasında gerçək tarazlığını təmin etməkdir.
