Krediti olanlara kömək üçün fond yaradıldı
Sentyabrın 15-də prezident İlham Əliyev sahibkarların maliyyə resurslarına çıxış imkanlarının genişləndirilməsinə dövlət dəstəyi ilə bağlı bir sıra tədbirlərə fərman verib. Novator.az-ın məlumatına görə, fərman “Azərbaycan Respublikasının Kredit Zəmanət Fondu” Açıq Səhmdar Cəmiyyətinin yaradılmasını nəzərdə tutur.
Yeni qurum sahibkarların müvəkkil banklardan manatla aldıqları kreditlərə təminat verən və prezidentin müəyyən etdiyi hallarda və qaydada həmin kreditlərə hesablanmış faizlərin bir hissəsinə subsidiya verən hüquqi şəxsdir.
ASC-də ictimai əsaslarla fəaliyyət göstərən və 7 nəfərdən ibarət Müşahidə Şurası, habelə cari rəhbərliyi həyata keçirən İdarə Heyəti yaradılır.
Müşahidə Şurası prezidentlə razılaşdırmaqla Maliyyə Nazirliyinin (1 nəfər), İqtisadiyyat Nazirliyinin (1 nəfər), Mərkəzi Bankın (1 nəfər), Maliyyə Bazarlarına Nəzarət Palatasının (1 nəfər), Dövlət Neft Fondunun (1 nəfər), Sahibkarlar (İşəgötürənlər) Təşkilatları Milli Konfederasiyasının (1 nəfər) və Azərbaycan Banklar Assosiasiyasının (1 nəfər) nümayəndələrindən ibarət tərkibdə formalaşdırılır.
Şura üzvləri öz aralarından ardıcıl qaydada sədr seçirlər. Sədrin səlahiyyət müddəti 1 (bir) ildir və o, ardıcıllıq nəzərə alınmaqla növbəti müddətlərə yenidən seçilə bilər.
İdarə Heyətinin sədrinin və sədr müavininin vəzifəyə təyin və vəzifədən azad edilməsi prezidentin səlahiyyətindədir.
Müşahidə Şurası İdarə Heyəti sədrinin təqdimatı əsasında digər üzvləri vəzifəyə təyin və vəzifədən azad edəcək.
ASC-nin yaradılması uçun işçi qrup formalaşdırılıb. İşçi qrupun rəhbəri postu Prezident Administrasiyasının iqtisadi siyasət və sənaye məsələləri şöbəsinin monetar və fiskal siyasət məsələləri sektorunun müdiri Kamil Heydərova verilib.
Qrupun üzvləri bu şəxslərdir:
Asif Qasımov – Mərkəzi Bankın Tədqiqatlar Departamentinin direktoru
Asim Zülfüqarov – Maliyyə Bazarlarına Nəzarət Palatasının baş icraçı direktorunun müavini, Strateji Xidmətlər Departamentinin direktoru
Samir Hümbətov – Sahibkarlığa Kömək Milli Fondunun sahibkarlığın inkişafı şöbəsinin müdiri
Xalid Əhədov – “Azərbaycan Beynəlxalq Bankı” Açıq Səhmdar Cəmiyyətinin İdarə Heyətinin sədri
Cəlal Qasımov – “Kapital Bank” Açıq Səhmdar Cəmiyyətinin Müşahidə Şurasının sədri
Nuran Kərimov – “Deloitte & Touche” Məhdud Məsuliyyətli Auditor Cəmiyyətinin idarəedici partnyoru
Vüqar Əliyev – “KPMG Audit Azərbaycan” Məhdud Məsuliyyətli Cəmiyyətinin icraçı direktoru.
