Faiq Əmirli azadlığa çıxdı
Sentyabrın 15-i Bakı Apellyasiya Məhkəməsində AXCP sədrinin köməkçisi, “Azadlıq” qəzetinin maliyyə direktoru Faiq Əmirli barəsində Səbail Rayon Məhkəməsinin hökmündən şikayətə baxılıb.
Novator.az-ın məlumatına görə, məhkəmə onun cəzasının qalan hissəsini şərti cəza ilə əvəzləyib və həbsdən buraxılmasına qərar verib. Qərar elan olunan kimi Faiq Əmirli məhkəmə zalından azadlığa buraxılıb.
Faiq Əmirli iyulun 24-də Səbail Rayon Məhkəməsinin hökmü ilə 3 il 3 ay müddətinə azadlıqdan məhrum edilib. O, xeyli miqdarda vergidən yayınmada və qulluq mövqeyindən istifadə etməklə milli, irqi, sosial və ya dini nifrət, düşmənçiliyin salınmasında təqsirli bilinib. Ona qarşı Vergilər Nazirliyinin mülki iddiası da təmin olunub, Səbail Rayon Məhkəməsinin qərarında onun dövlətə 39 min manat ödəməli olduğu qeyd edilib.
Faiq Əmirli həbs ediləndən “Azadlıq”ın bank əməliyyatı aparması mümkün olmayıb, 2016-cı il sentyabrın 5-də qəzetin çapı dayanıb.
