10 manatlıq yeni xidmət
Əmlak Məsələləri Dövlət Komitəsi vətəndaşlara yeni xidmət təklif edir. “Daşınmaz əmlakla bağlı dövlət reyestrindən məlumatın verilməsi” elektron xidməti sayəsində hər kəs sahib olduğu əmlak, onun sahəsi, yerləşdiyi ünvan, ölçüləri və texniki göstəriciləri, aparılan əməliyyatlar barədə heç yerə getmədən, internetlə ətraflı məlumat ala bilər.
Komitə bildirir ki, xidmətdən istifadə üçün “elektron imza” tələb edilmir. Əmlak sahibi komitənin elektron xidmətlər portalına (e-emdk.gov.az) və ya elektron hökumət portalına daxil olmaqla açılan xanaların hər birində daşınmaz əmlakın reyestr və qeydiyyat nömrəsini yazır. Bundan sonra ekranda əks olunan 10 manat dövlət rüsumu ödəndikdə ekranda əmlakla bağlı məlumatlar – reyestr nömrəsi, qeydiyyat tarixi, ünvanı, torpağın və tikilinin sahəsi, tikilinin mərtəbə və otaq sayı, hüquq sahibi barədə məlumatlar görünür.
