Zakir Həsənov Holokost abidəsini ziyarət edib
İsrailə səfər edən müdafiə naziri Zakir Həsənov sentyabrın 11-i Tel-Əviv şəhərində həmkarı Aviqdor Libermanla görüşüb. Nazirlər əvvəl təkbətək bir araya gəliblər. Nümayəndə heyətlərinin geniş tərkibdə keçirilən görüşündə isə regional təhlükəsizlik, iki ölkə arasında hərbi, hərbi-texniki və digər qarşılıqlı maraq doğuran sahələrdə əməkdaşlıq məsələləri müzakirə olunub.
Mod.gov.az-ın məlumatına görə, həmin gün Müdafiə Nazirliyinin nümayəndə heyəti İkinci Dünya müharibəsi illərində nasizmin qurbanı olmuş yəhudilərin xatirəsinə ucaldılan “Yad Vaşem” memorial kompleksini ziyarət edib. Zakir Həsənov Holokost qurbanlarının abidəsi önünə əklil qoyub və xatirə kitabını imzalayıb.
