Mehmanxana biznesində gəlir 37,8 faiz artıb
Dövlət Statistika Komitəsi mehmanxana və mehmanxana tipli müəssisələrin fəaliyyəti haqqında hesabat yayıb. Novator.az-ın məlumatına görə, bildirilir ki, 2017-ci ilin yanvar-iyun aylarında ölkənin mehmanxana və mehmanxana tipli müəssisələrində 602 min nəfər yerləşdirilib. Ötən ilin müvafiq dövrü ilə müqayisədə qonaqların sayında 42,9 faiz artım müşahidə edilib. Mehmanxana və mehmanxana tipli müəssisələrdə yerləşdirilən şəxslərin 68,4 faizi xarici ölkə vətəndaşları olub.
Hesabata əsasən, gecələmələrin 58,2 faizi Bakıda, 9,3 faizi Qəbələdə, 5,8 faizi Qusarda, 4,1 faizi Naxçıvan Muxtar Respublikasında, 2,1 faizi Qubada, 1,5 faizi Şamaxıda, 1,4 faizi Xaçmazda, 17,6 faizi digər şəhər və rayonlarda yerləşən mehmanxanalarda qeydə alınıb.
6 ayda mehmanxana və mehmanxana tipli müəssisələrin gəlirləri 136,6 milyon manat olub, bu da ötən ilin eyni dövrü ilə müqayisədə 37,8 faiz çoxdur. Gəlirlərin 71 faizi xarici vətəndaşlara göstərilən xidmətlər nəticəsində formalaşıb.
Xidmətlərin göstərilməsinə 105,2 milyon manat xərc çəkilib. Bu müəssisələrdə çalışan işçilərin sayı ötən ilin eyni dövrü ilə müqayisədə 11,8 faiz artaraq 9 min 770 nəfərə çatıb. Bir işçiyə düşən orta aylıq nominal əməkhaqqının məbləği 579,3 manat təşkil edərək ölkə üzrə orta göstəricini 11,1 faiz üstələyib.
