Bir ildən çox boş qalan vəzifə tutuldu
Prezident İlham Əliyev İlham İsa oğlu Mədətovu Azərbaycan Turizm və Menecment Universitetinin rektoru təyin edib. Sərəncam sentyabrın 11-də imzalanıb.
Novator.az bildirir ki, İlham Mədətov Bakı Dövlət Universitetinin şərqşünaslıq fakültəsini bitirib, tərcüməçi və ərəb filoloqudur. SSRİ Quraşdırma və Xüsusi Tikinti İşləri Nazirliyində mühəndis, Misir Ərəb Respublikasında tərcüməçi kimi fəaliyyət göstərib, müxtəlif dövlət orqanlarında çalışıb. 1995-ci ildən Gənclər, İdman və Turizm Nazirliyinin beynəlxalq əlaqələr idarəsinin rəisi, 2006-cı ildən Gənclər və İdman Nazirliyinin beynəlxalq əlaqələr şöbəsinin müdiri olub.
Turizm və Menecment Universitetinin rektoru vəzifəsi ötən il iyunun 23-dən boş idi. Həmin gün prezident İlham Əliyev Cəfər Cəfərovu Turizm və Menecment Universitetinin rektoru vəzifəsindən çıxararaq Azərbaycan Dövlət Pedaqoji Universitetinin rektoru təyin edib. Rektor səlahiyyətlərinin icrası siyasi elmlər üzrə fəlsəfə doktoru Eldar Aslanova həvalə olunmuşdu.
Mədəniyyət və Turizm Nazirliyinin tabeliyində olan Turizm və Menecment Universiteti ali təhsilin bütün pillələrində turizm və menecment sahələri üzrə kadr hazırlığını həyata keçirir. Universitetin əsası 2006-cı ildə qoyulub.
