Polşada Azərbaycan abidəsi
Polşaya səfər edən müdafiə naziri Zakir Həsənov sentyabrın 7-si paytaxt Varşavada Azərbaycan Xalq Cümhuriyyəti dövrünün hərbi xadimləri general-leytenant Süleyman bəy Sulkeviç və polkovnik Vəli bəy Yadigarın xatirəsinə ucaldılmış abidənin açılışına qatılıb. Azərbaycan səfirliyinin əməkdaşlarının, Polşa Silahlı Qüvvələrinin rəhbərliyinin, Xarici İşlər Nazirliyi, Milli Yaddaş İnstitutu, Polşa Parlamenti, Veteranlar Təşkilatı, paytaxt administrasiyası nümayəndələrinin iştirak etdiyi mərasimdə çıxış edən nazir tarixən sıx olan Polşa-Azərbaycan münasibətləri barədə danışıb, tədbirin simvolik əhəmiyyət daşıdığını və iki ölkə arasında hərbi əməkdaşlığın inkişafında mühüm rol oynayacağına əmin olduğunu vurğulayıb.
Mod.gov.az-ın məlumatına görə, tədbirdə çıxış edənlər general-leytenant Süleyman bəy Sulkeviçin (Matsey Aleksandroviç Sulkeviç) 1919-cu ilin mart ayından 1920-ci ilin fevral ayınadək Azərbaycan Xalq Cümhuriyyəti ordusunun Baş Qərargah rəisi vəzifəsində xidmətdə olarkən milli hərbi hissələrin yaradılması və ölkənin müdafiə sisteminin qurulmasında gördüyü əhəmiyyətli işlərdən bəhs ediblər.
Azərbaycan Xalq Cümhuriyyəti ordusunun zabiti Vəli bəy Yadigarın 1920-ci ildə Azərbaycanın işğalından sonra Polşaya mühacirəti, Mazovetski süvari briqadasının qərargah rəisi vəzifəsində xidməti, Armiya Krayovanın tərkibindəki polkun komandiri kimi Varşava üsyanında iştirakı və digər maraqlı faktlar mərasim iştirakçılarının diqqətinə çatdırılıb.
