Nazirlikdən dərman xəbərdarlığı
İqtisadiyyat Nazirliyi müraciət yayaraq istehlakçıları dərman alarkən qiymətlərə diqqət yetirməyə çağırıb. İstehlakçılara dərman vasitələrinin təsdiq olunmuş qiymətlərdən fərqli qiymətlərlə satışı halları ilə rastlaşdıqda 195-2 Çağrı Mərkəzinə, 498-15-01 və 498-15-04 nömrəli telefonlarla Antiinhisar Siyasəti və İstehlakçıların Hüquqlarının Müdafiəsi Dövlət Xidmətinə məlumat vermələri tövsiyə olunub.
Novator.az xatırladır ki, Tarif Şurası 2015-ci ildən başlayaraq ticarət adı, təsiredici maddəsinin adı, dozası, farmasevtik forması, ticarət qablaşdırması, qablaşdırma miqdarı, istehsal ölkəsi nəzərə alınmaqla 10385 dərman vasitəsinin topdan və pərakəndə satış qiymətlərini təsdiq edib (Siyahı).
“Dərman vasitələri haqqında” qanuna əsasən, qiymətləri tənzimlənmiş dərman vasitələrinin istehlakçılara fərqli qiymətlərlə satışı qadağandır. Buna görə İnzibati Xətalar Məcəlləsində vəzifəli şəxslərə 1000 manatdan 1500 manatadək, hüquqi şəxslərə 3000 manatdan 5000 manatadək cərimə nəzərdə tutulur.
