Əlilliyi olan şəxslərə 8 ayda nə xidmətlər göstərilib?
Bu ilin 8 ayı ərzində Əmək və Əhalinin Sosial Müdafiəsi Nazirliyi əlilliyi olan şəxsləri 20128 reabilitasiya vasitəsi və protez-ortopedik məmulatla təmin edib. Rəsmi hesabata görə, protez-ortopedik bərpa xidmətləri göstərilmiş 6410 nəfərin 769 nəfəri ölkənin ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlil olmuş şəxslərdir.
Əlilliyi olan şəxslərə yanvar-avqust aylarında 411 ədəd əlil arabası, 789 aşağı və yuxarı ətraf protezləri, 1226 aşağı və yuxarı ətraf ortezi, 868 ədəd dirsəkaltı ağac, 429 ədəd dördayaqlı dayaq vasitəsi verilib. Onlar 389 ədəd bel və boyun nahiyəsi üçün korset, 3173 cüt ortopedik ayaqqabı, 1710 cüt protez ayaqqabı, 5985 ədəd müxtəlif reabilitasiya vasitəsi, 540 cüt qoltuqaltı ağac, 1241 ədəd əsa, 254 ədəd eşitmə aparatı və s. ilə də təmin ediliblər. Onlara məxsus 511 ədəd reabilitasiya vasitəsi və protez-ortopedik məmulatın təmiri işləri də aparılıb.
Hesabat dövründə Protez-Ortopedik Bərpa Mərkəzi və onun Gəncə şəhərindəki filialının mürəkkəb protezləşdirmə stasionarlarında 401 nəfər əlilliyi olan şəxsə reabilitasiya xidmətləri göstərilib.
