Azərbaycan rəsmilərini ABŞ-a buraxmamaq təklif olunur
ABŞ senatoru Riçard Durbin jurnalist Mehman Əliyevin həbsində iştirakı olan Azərbaycan rəsmilərinə sanksiyalar barədə düzəliş təqdim edib. “Amerikanın səsi” bildirir ki, düzəliş Mehman Əliyevin həbsində rol oynamış bütün Azərbaycan rəsmilərinin ABŞ-a girişinə qadağa nəzərdə tutur. Dövlət katibindən sanksiyaya məruz qalacaq Azərbaycan rəsmilərini müəyyən etmək xahiş olunur.
Düzəliş 2018-ci büdcə ilindən ötrü ştat və xarici əməliyyatlara dair qanun layihəsinin müzakirəsi əsnasında təqdim olunub, sənədi Vaşinqtonda komitə heyəti nəzərdən keçirir.
72 yaşlı Riçard Durbin Senatda İllinoys ştatını təmsil edir, Demokratlar Partiyasının üzvüdür. 20 ildir senator olan Riçard Durbin insan hüquqlarının fəal müdafiəçisi kimi ad çıxarıb.
“Turan” informasiya agentliyinin direktoru olan Mehman Əliyev Vergilər Nazirliyində qaldırılmış cinayət işi üzrə avqustun 24-də tutulub, qanunsuz sahibkarlıq, vergidən yayınma və vəzifə səlahiyyətlərindən sui-istifadədə ittiham olunur. İstintaq iddia edir ki, Mehman Əliyev dövlət qeydiyyatına alınmamış qrant müqavilələri üzrə 148 min manatdan çox qanunsuz gəlir əldə edib, 60 min manatdan çox mənfəət vergisini dövlət büdcəsinə ödəməkdən yayınıb. Yasamal Rayon Məhkəməsi avqustun 25-də Mehman Əliyev haqqında 3 aylıq həbs qətimkan tədbiri seçib.
