Məhbus jurnalistlər və Gözəl Bayramlı ilə bağlı araşdırma aparılıb
Ombudsmanın Milli Preventiv Qrupunun (MPQ) üzvləri Bakı İstintaq Təcridxanasına baş çəkib. Sentyabrın 7-si APA-da yayılan rəsmi məlumata görə, müəssisədə bir çox şəxslər, o cümlədən jurnalistlər Mehman Əliyev, Əfqan Muxtarlı, Əziz Orucov, AXCP sədrinin müavini Gözəl Bayramlı fərdi qəbul edilib, onların hüquqlarının təmin olunması vəziyyəti, müraciətləri və qaldırdıqları məsələlər yerində araşdırılıb.
Qəbul edilmiş şəxslər müəssisə əməkdaşlarının rəftarından şikayət etməyib, bəziləri barələrində aparılan istintaqdan narazılıqlarını bildiriblər. Hər bir şəxsə qaldırdıqları məsələlər üzrə hüquqi məsləhətlər verilib. Ombudsmana ünvanlanmış ərizələr qəbul olunub və bir sıra müraciətlər yerində təmin edilib.
Müəssisə rəhbərliyi və məsul əməkdaşlarla saxlanma şəraitinin təkmilləşdirilməsi və hüquqlarının həyata keçirilməsi ilə bağlı müzakirələr aparılıb, tövsiyələr verilib.
