Əziz Orucovun işi üzrə istintaq yekunlaşıb
“Kanal 13” internet televiziyasının direktoru Əziz Orucovun işi üzrə istintaq yekunlaşıb.
Jurnalistin vəkili Cavad Cavadovun yaydığı məlumata görə, artıq müdafiə tərəfi iş materialları ilə tanış olmağa başlayıb.
Tanışlıq mərhələsi başa çatdıqdan sonra iş baxılması üçün Bakı Ağır Cinayətlər Məhkəməsinə göndəriləcək.
Əziz Orucov mayın 2-də polisə müqavimətdə təqsirli bilinərək 30 sutka inzibati həbs cəzası alıb. Sonra ona Cinayət Məcəlləsinin 192.2-ci (qanunsuz sahibkarlıqla külli miqdarda gəlir əldə etmə) və 308.2-ci (ağır nəticələrə səbəb olan vəzifə saxtakarlığı) maddələri ilə cinayət işi başlanıb, 4 aylıq həbs qətimkan tədbiri seçilib. Avqustun 29-da həbs müddəti 3 ay uzadılıb.
Əziz Orucov dövlət qeydiyyatına alınmamış qrant vəsaitlərindən külli miqdarda qanunsuz gəlir əldə etməkdə təqsirli bilinir. İstintaqı Baş Prokurorluğun Ağır Cinayətlərə Dair İşlər üzrə İstintaq İdarəsi aparır.
Direktorun həbsindən az sonra “Kanal 13” fəaliyyətini dayandırıb.
