Paytaxtın sosial-iqtisadi göstəriciləri
Bakı Şəhər Statistika İdarəsi paytaxtın bəzi sosial-iqtisadi göstəricilərini açıqlayıb. Novator.az-ın məlumatına görə, hesabatda deyilir ki, 2017-ci ilin yanvar-iyul aylarında sənayedə istehsal olunmuş malların və göstərilmiş xidmətlərin həcmi 5,6 faiz azalaraq 18,4 milyard manat təşkil edib.
Sənayedə qeyri-dövlət sektorunun payının 81,2 faiz olduğu, ümumi istehsalın 85,8 faizinin sənaye məhsulunun istehsalı, 14,2 faizi isə sənaye xarakterli xidmətlərin göstərilməsi hesabına yaradıldığı bildirilir.
Bakı Şəhər Statistika İdarəsi qeyd edir ki, 7 ayda paytaxtın iqtisadi və sosial sahələrinin inkişafına 8 milyard 49,2 milyon manat və ya əvvəlki ilin müvafiq dövrü ilə müqayisədə 2,6 faiz çox vəsait yönəldilib. Ümumi sərmayənin 28,9 faizi dövlət, 71,1 faizi qeyri-dövlət sektorunun sərmayədarlarının payına düşüb. Əsas kapitala yönəldilmiş vəsaitlərin 70,7 faizi tikinti-quraşdırma işlərinə sərf edilib.
Hesabata əsasən, 2017-ci ilin yanvar-iyul aylarında pərakəndə ticarət dövriyyəsinin həcmi 2016-cı ilin yanvar-iyul aylarına nisbətən müqayisəli qiymətlərlə 2,7 faiz artaraq 10 milyard 304,9 milyon manat olub.
7 ayda ictimai iaşə dövriyyəsinin həcminin əvvəlki ilin eyni dövrü ilə müqayisədə real ifadədə 2,6 faiz artaraq 494 milyon manat olduğu vurğulanır.
Əhaliyə göstərilən ödənişli xidmətlərin həcmi isə 2017-ci ilin yanvar-iyun aylarında ötən ilin müvafiq dövrünə nisbətən 0,6 faiz azalaraq 2 milyard 269 milyon 194,1 min manat olub.
2017-ci ilin yanvar-may aylarında şəhərin nəqliyyat müəssisələrində orta aylıq əməkhaqqı 832,9 manata, rabitə müəssisələrində orta aylıq əməkhaqqı isə 1073,7 manata çatıb.
