8 oldu
Asiyada dünya futbol çempionatının seçmə mərhələsi finiş xəttini haqlayıb. Novator.az-ın məlumatına görə, sentyabrın 5-də keçirilən oyunlarla daha bir raunda yekun vurulub, A və B qruplarında ikinci yerləri tutan Cənubi Koreya ilə Səudiyyə Ərəbistanı final mərhələsinə adlayıb.
A qrupundan İran, B qrupundan Yaponiya finala daha əvvəl vəsiqə almışdı.
Qruplarda üçüncü olmuş Suriya ilə Avstraliya öz aralarında iki oyun keçirəcək. Bu cütlüyün qalibi Şimali və Mərkəzi Amerikanın təmsilçisi ilə üz-üzə gələcək. Həmin zonada 6 komanda bir qrupda yarışır. Lider Meksika dünya çempionatının finalına vəsiqə qazanıb. Kosta Rika ikinci, Panama üçüncüdür. Bu mövqelər final raunduna birbaşa vəsiqə verir. Dördüncü pillədə olan ABŞ isə Suriya – Avstraliya oyunlarının qalibi ilə üz-üzə gəlməyə namizəddir.
Rusiyada keçiriləcək final mərhələsinə indiyəcən Cənubi Amerikadan Braziliya, Avropadan Belçika da vəsiqə alıb. Çempionat sahibini də sayanda 8 milli komanda adını finala yazdırıb. Digər 24 vəsiqə uğrunda mübarizə davam edir.
