Prezident şəhidin adını daşıyan məktəbə baş çəkib
Sentyabrın 5-də prezident İlham Əliyev Bakının Nizami rayonunda şəhid Xalid Quliyev adına 62 saylı məktəb-liseydə əsaslı təmirdən sonra yaradılan şəraitlə tanış olub.
AZƏRTAC xəbər verir ki, 41 sinif, 2 informatika, 3 laboratoriya otaqlarından, hərbi təlim sinfindən, idman və akt zallarından, yeməkxanadan ibarət məktəb 1964-cü ildən fəaliyyət göstərir. Əsaslı təmir olunan təhsil müəssisəsinin yerləşdiyi ərazinin sahəsi 11 min kvadratmetrdir. 984 şagird yerlik məktəbdə tədrisin müasir səviyyədə qurulması üçün hər cür şərait yaradılıb. Tədris müəssisəsi lazımi avadanlıqla tam təchiz olunub.
Yeni tədris ilində şagirdlərin ixtiyarına veriləcək futbol, voleybol və basketbol meydançalarında da əsaslı yenidənqurma işləri görülüb. Məktəbin həyətyanı ərazisində geniş abadlıq işləri aparılıb, işıqlandırma sistemi quraşdırılıb.
Dövlət başçısı məktəb-liseydə yaradılan “Sağlam təhsil” sinifləri ilə də tanış olub. “Sağlam təhsil-sağlam millət” layihəsinin məqsədi məktəblərdə şagirdlərin sağlamlığının qorunması və təhsil nailiyyətlərinin yüksəldilməsindən ibarətdir. Ümumtəhsil müəssisələrində bu pilot layihənin tətbiqinə 2014-2015-ci tədris ilindən başlanıb, ötən tədris ilində paytaxtdakı 27 tam orta məktəbdə 36 sinifdə icra olunub. Layihə 2017-2018-ci tədris ilində isə 40 sinfi əhatə edəcək.
Prezident Nizami rayonundakı 201 və 10 saylı orta məktəblərə də baş çəkib.
