Mehman Əliyevin həbsinin girovla əvəzlənməsi üçün vəsatət verilib
Sentyabrın 4-də vəkil Fuad Ağayev “Turan” informasiya agentliyinin direktoru Mehman Əliyevin həbsinin girovla əvəzlənməsi üçün Yasamal Rayon Məhkəməsinə vəsatət verib.
Vəkil “Amerikanın səsi”nə deyib ki, qanunvericiliyə əsasən məhkəmə üç gün ərzində vəsatətə baxmalıdır.
Azərbaycan qanunvericiliyi az ağır cinayətlərə görə həbs qətimkan tədbirinin girovla əvəzlənməsinə imkan verir. Bundan ötrü ən azı 10 min manat məbləğində girov qoyulmalıdır.
Qanuna əsasən, girov kimi əmlak da qoyula bilər.
Mehman Əliyev Vergilər Nazirliyinin Vergi Cinayətlərinin İbtidai Araşdırılması Departamentinin qaldırdığı cinayət işi üzrə avqustun 24-də tutulub. O, qanunsuz sahibkarlıq, vergidən yayınma və vəzifə səlahiyyətlərindən sui-istifadədə ittiham olunur.
İstintaq iddia edir ki, Mehman Əliyev 2010-2014-cü illərdə dövlət qeydiyyatına alınmamış qrant müqavilələri üzrə 148310 manat məbləğində qanunsuz gəlir əldə edib, 2010-2016-cı illərdə 60080 manat məbləğində mənfəət vergisini dövlət büdcəsinə ödəməkdən yayınıb.
Mehman Əliyev və müdafiəçiləri ittihamları rədd edir.
1957-ci il oktyabrında 26-da Bakının Buzovna kəndində anadan olan Mehman Əliyev “Molodyoj Azerbaydjana” qəzetinin, “Azərinform” agentliyinin müxbiri, “Xazar” jurnalının məsul katibi olub, prezidentin mətbuat xidməti rəhbərinin müavini vəzifəsində çalışıb. “Turan” informasiya agentliyini 1990-cı ildə təsis edib.
