Məktəbdə yeniliklər
Prezident İlham Əliyev sentyabrın 4-də Bakının Sabunçu rayonunun Bakıxanov qəsəbəsindəki 74 nömrəli tam orta məktəbdə əsaslı təmirdən sonra yaradılan şəraitlə tanış olub.
38 sinif otağı, 2 informatika kabineti, 3 laboratoriya, idman və akt zalları, hərbi otaq, yeməkxanadan ibarət məktəb 1960-cı ildən fəaliyyət göstərir. Məktəbdə əsaslı təmir işləri 2014-2016-cı illərdə Bakı və ətraf qəsəbələrin sosial-iqtisadi inkişafı dövlət proqramına əsasən aparılıb.
Təhsil müəssisəsinin yerləşdiyi ərazinin sahəsi 11 min kvadratmetrə yaxındır. 912 şagird yerlik məktəb müasir səviyyədə əsaslı təmir olunub. Burada videomüşahidə, səsgücləndirici, yanğın xəbərdarlığı və internet sistemləri quraşdırılıb. Tədris müəssisəsi zəruri mebel-inventar və digər avadanlıqla tam təchiz olunub.
Yeni tədris ilində şagirdlərin ixtiyarına veriləcək futbol meydançasında da lazımi idman qurğuları qoyulub. Məktəbin həyətyanı ərazisində geniş abadlıq işləri aparılıb, işıqlandırma sistemi quraşdırılıb.
Xəbəri AZƏRTAC yayıb.
