Meksika finala adladı
Şimali və Mərkəzi Amerikada dünya futbol çempionatının seçmə mərhələsinin növbəti oyunları keçirilib. Novator.az-ın məlumatına görə, Meksika milli komandası sentyabrın 1-i öz meydanında Panamanı 1:0 hesabı ilə yenərək final raunduna vəsiqə alıb.
Şimali və Mərkəzi Amerikada 6 komanda bir qrupda yarışır. 7 turdan sonra Meksika liderdir. Kosta Rika ikinci yeri tutur, onu ABŞ və Honduras təqib edir. İlk üç mövqe dünya çempionatının final raunduna birbaşa vəsiqə verir, dördüncü yerin sahibi isə Asiya təmsilçisi ilə üz-üzə gəlməli olacaq. Meksika qrupda ən azı üçüncü yeri təmin edib.
Asiyadan indiyədək İran və Yaponiya dünya çempionatının finalına çıxıblar.
İran A qrupunda birinci pilləni təmin edib. Cənubi Koreya ikinci yerdədir, Suriya və Özbəkistan üçüncü yeri bölüşürlər.
B qrupunda erkən qalib olan Yaponiyanı Səudiyyə Ərəbistanı və Avstraliya izləyir. Birləşmiş Ərəb Əmirlikləri dördüncü pillədə qərar tutub.
Qruplarda ilk iki yeri tutan komandalar dünya çempionatına birbaşa yollanır. Üçüncülərin öz aralarındakı oyunlarının qalibi isə Şimali və Mərkəzi Amerikanın təmsilçisi ilə üz-üzə gəlməlidir.
2018-ci ildə Rusiyada meydan sahibi və daha 31 komandanın iştirakı ilə keçiriləcək çempionata indiyəcən Cənubi Amerikadan Braziliya da vəsiqə alıb.
