Xəzər haradan quruyur?
ABŞ, Fransa, Rusiya və Azərbaycan alimləri Xəzərdə suyun səviyyəsini araşdırıb. Novator.az-ın məlumatına görə, araşdırma göstərir ki, 1996-cı ildən 2015-ci ilə qədər dənizdə suyun səviyyəsi ildə 7 santimetr enib. 20 ildə Xəzərdə suyun ümumi səviyyəsi 1,4 metr enib və 1970-ci ildə qeydə alınmış ən aşağı həddən (dəniz səviyyəsindən 29 metr aşağı) cəmi 1 metr yuxarı olub.
Ekspertlər Xəzərdə suyun səviyyəsinin daha da azalacağını proqnozlaşdırır. Ən çox azalma Xəzərin şimal hissəsində, dərinliyi təqribən 5 metr olan zonada (Rusiya və Qazaxıstan sektorları) gözlənir. Qeyd olunur ki, istiləşmə tempi indiki səviyyədə qalsa, Xəzərin həmin hissəsi 75 ildən sonra qurumağa məhkumdur.
Xəzərdə qurumanın əsas səbəbi kimi qlobal istiləşmə üzündən atmosferin yuxarı təbəqəsində temperaturun artması göstərilir.
Səidə Hüseynova
