Mehman Əliyevlə bağlı qərar dəyişmədi
Avqustun 30-da Bakı Apellyasiya Məhkəməsində “Turan” informasiya agentliyinin direktoru Mehman Əliyevin həbsindən şikayətə baxılıb. Şikayət təmin olunmayıb, Mehman Əliyev həbsdə saxlanıb.
Mehman Əliyev avqustun 24-də tutulub. Avqustun 25-də Yasamal Rayon Məhkəməsi onu 3 aylıq həbs edib. Qərar Vergilər Nazirliyinin “Turan”dakı yoxlamaları çərçivəsində, Vergi Cinayətlərinin İbtidai Araşdırılması Departamentinin təqdimatı əsasında çıxarılıb. Mehman Əliyev qanunsuz sahibkarlıq, vergidən yayınma və vəzifə səlahiyyətlərindən sui-istifadədə ittiham olunur.
İstintaq iddia edir ki, Mehman Əliyev 2010-2014-cü illərdə dövlət qeydiyyatına alınmamış qrant müqavilələri üzrə 148310 manat məbləğində qanunsuz gəlir əldə edib, 2010-2016-cı illərdə 60080 manat məbləğində mənfəət vergisini dövlət büdcəsinə ödəməkdən yayınıb.
Jurnalist Bakı İstintaq Təcridxanasında saxlanır.
