DTX keçirdiyi əməliyyat-axtarış tədbirləri haqda açıqlama yayıb
Dövlət Təhlükəsizliyi Xidməti bu ilin 7 ayında həyata keçirdiyi əməliyyat-axtarış tədbirləri haqda açıqlama yayıb.
Novator.az-ın məlumatına görə, açıqlamada bildirilir ki, 7 ay ərzində 44 kiloqramdan artıq narkotik vasitənin, habelə güclü təsiredici psixotrop maddələrin qaçaqmalçılıq yolu ilə ölkəyə daşınmasının və yayılmasının qarşısı alınıb. Faktlarla bağlı 11 cinayət işi başlanıb, 24 Azərbaycan və 1 İran vətəndaşı cinayət məsuliyyətinə cəlb olunub.
Keçirilmiş baxışlar zamanı ayrı-ayrılıqda 14 kiloqram heroin, 14 kiloqram tiryək, 12 kiloqramdan artıq qurudulmuş marixuana, 4 kiloqram 500 qram həşiş və psixotrop maddə olan 1531 ədəd həb, eləcə də həmin şəxslərdən 1 ədəd “Makarov” tipli tapança və ona aid daraq, 2 ədəd tüfəng və xeyli sayda müxtəlif çaplı patronlar aşkar edilib.
Narkotiklərin qanunsuz dövriyyəsi üzrə digər faktlarla bağlı 287 nəfər barəsində məlumatlar müvafiq araşdırmalar aparılması üçün aidiyyəti üzrə hüquq mühafizə orqanlarına göndərilib.
