Yeni həmsədr fəaliyyətə başladı
ABŞ Dövlət Departamenti Endrü Skoferin ATƏT-in Minsk qrupunun yeni həmsədri təyin edilməsi ilə əlaqədar bəyanatla verib.
Avqustun 28-də ABŞ-dan müvəqqəti həmsədr Riçard Hoqlandın səlahiyyət müddəti başa çatıb.
Dövlət Departamentinin bəyanatında qeyd olunur ki, Endrü Skoferin Avropada və beynəlxalq təşkilatlarda böyük iş təcrübəsi var: “Birləşmiş Ştatlar əvvəlki kimi qəti şəkildə Minsk qrupu prosesinə və Dağlıq Qarabağ münaqişəsinin dinc yolla və davamlı nizamlanmasına müvəffəq olmaqda tərəflərə kömək göstərməyə tərəfdardır. ABŞ Dağlıq Qarabağ münaqişəsinin beynəlxalq hüququn, o cümlədən Helsinki Yekun Aktının norma və prinsipləri əsasında ədalətli həllini dəstəkləyir. Endrü Skofer tərəflərin bu məqsədə çatmalarına kömək etməyə ümid bəsləyir”.
Xəbəri AZƏRTAC yayıb.
Novator.az bildirir ki, Endrü Skofer son vaxtlar ABŞ-ın beynəlxalq təşkilatlardakı missiyasında müvəqqəti işlər vəkili olub. O, Kipr münaqişəsi və digər münaqişələrin həlli üzrə diplomatik fəaliyyət göstərib.
Minsk qrupunda digər həmsədrlər Fransadan Stefan Viskonti, Rusiyadan İqor Popovdur.
1992-ci ildə Dağlıq Qarabağ münaqişəsinin dinc yolla tənzimləməsi üçün yaradılan Minsk qrupunun 11 üzvü var: Rusiya, Fransa, ABŞ, Belarus, Almaniya, İtaliya, İsveç, Finlandiya, Türkiyə, Ermənistan, Azərbaycan. 1994-cü ildə həmsədrlik institutu yaradılıb.
